Thursday, September 3, 2009

خواطر لقيمات وقطايف





لا تخافووون مو وصفات تحضير :P
بس الغربة وما تسوي

الغربة وما ادراك ما الغربة ,,, اللي قاعد بالديرة ما يحس باللي بعيد عنها وعباله السفر وناسة ما يدري ان فينا شوووق وحنين ما يخلينا ننسى ابسط الذكريات

يا جماعة شنو حل الغربة ؟ وصدقوني اللي يقول رمضان بره مثل الكويت غلطاااااااااااااان ,,, وين ايام اللقيمات والقطايف والبسبوسة والكنافة واشكال وانواع واصناف الاطباق ؟؟ وين صلاة التراويح وراحتها النفسية ؟؟ وين ايام قعدات الاهل وسوالفهم اللي ما تنمل ؟؟

اللي مسافر يخليه على المافن والكب كيك الى ان ربك يسهلها

____________________

من زوود ما حاشني homesickness (اشتياق للوطن ) قمت اتذكر قصايد واغاني اول

وهاذي اهداء




وصيت قلبي عليك وفكري وظني = إن غبت عنهم عليك عتابهم هادي
ماودي تجرح شعورك كلمة مني = وانته حياتي وعمري ومهجة فوادي
ودي تعيش العمر راضي ومتهني = مرفوع راسك عليك العز متبادي
يا تاج راسي وانته مني وعني = تآمر وتنهي وأمرك أول البادي
من كثر خوفي عليك الخوف يمحني = وافقد شعوري واشوفك غاية مرادي
إن غاب صوتك أنا جي الليل واوني = وتخيلك واتذكر هامت بلادي
مديون لك بالغلا والحب مشقني = يا مستحل الفواد العاشق الغادي
من يشبهك في البشر يا ذوقي وفني = يا راحتي وبسمتي وموتي وميلادي
وصيت قلبي عليك وقال متجني = أحذر غيابك على قلبي ما هو بعادي
يا شوق روحي وقلبي وقطعة مني = عتابك الطف من النسمة على فوادي
ما يجرح القلب إلا غيبتك عني = ولا عتابك يشابهه طبعك الهادي
أنا اهتني يوم أشوفك أنت متهني = واشوف نور الهنا في طلتك بادي
ما يختلف فيك ظني ياحسن ظني = دايم وفيا معي يا وردة بلادي
لا تخاف مني ومن قلبي إذا وني = أكيد مشتاق لك يا غاية مرادي
ما يتعب القلب غير الشوق لكني = أصبره بالقصيد وصوتك الشادي
أنا احبك وحبك من صغر سني = ما بالغ إن قلت لك من يوم ميلادي
اكبر ويكبر غلاك ألي مجنني = غصبا على عيون حسادك وحسادي
لا توصي القلب غير الشوق متعبني = ما دمت احبك عتابك ما هو بعادي
عتاب قلبك على حبك يطمني = خله يعاتبني أنا سلمته فوادي

4 comments:

صوت الكويت said...

بوبراك شكلك أم براك مو عندك ولا هذا لقب المستقبل إنشاء الله
إذا لقب المستقبل فأحسن لك إدورك على بنت حلال لأن الغربه قشره

بو براك said...

والله انا قايل للاهل بس يقولون توك صغير :P
ما يدرون انه ما بقى بالعمر كثر ما راح :P

يالله حسن الخاتمة بس

SHOOSH said...

الغربه أم الويل

ترد لنا و لأحبابك سالم إنشاءالله

بو براك said...

اي والله صدقتي
بس الله كريم انشالله

الله يسلمج ما قصرتي